|
|
請恕原文流於口語化，看不懂的話再按吧。
1.坐的士俾錢，永遠求其響銀包拎張銀紙就係果程車之車費…
好心Ｄ，就講多句「唔使找」…有冇咁豪呀？
2.開門鎖永遠一支萬字夾或者信用咭就搞掂…
當然，如果當事火災而房入邊有個細蚊仔，就咁例外 (按：用一隻腳或身體”一撞即開”喥門)
3.所有計時炸彈，都會有個時間器響前面，
大大隻紅色數目字，話俾你知幾時爆炸
4.差佬楂車好鍾意「片尾」
5.check 親電腦資料，都會不厭其煩咁有好多嘟嘟聲
6.打交唔使做熱身，但係又永恆唔會抽筋咁巴閉
7.炸彈永遠係紅色線駁去引爆器.
8.遇到殺手/色狼/壞人時, 受害者永永遠遠會跑無人的街角.
9.男女主角永遠都會搭電梯遇不到, 一個上, 一個落, 基本上 80% 電視劇都有
10.永遠一落街一招手即刻有的士去到佢地面前,無論係午夜既飛鵝山或者星期六既旺角。
11. 手鎗子彈永遠用不完, 不論係左輪既六飛 或 曲尺既八飛.
12. 今時今日的高速電腦, 在顯示字樣時永遠係續字續行咁 "嘔" 出黎
13. 偷人地d data時永世都一定有個好靚既GUI (with "complete"字樣)
14. 如果仲有戲做既, 幾高跌落地都一定無事...我指係無傷
15. 夜視鏡既映像一定會靚過你隻 mon
16. 條跑道成地都係子彈殼都好, 架jet要起飛一定唔會有事
17. 無線電d人講野把聲清過你屋企堆CD
18. 壞人永遠將全盤計劃話畀人知
19. 主角永遠都唔需要去toilet
20. 壞人總是寧願將抓來的主角放在看似危險的地方, 方便逃生. 而不選擇一槍斃掉.
21. 幾多人食飯飲野都好, 一定唔會有人背住個鏡頭, u型咁坐
22. 炸彈唔到最後幾秒都唔拆或拆唔到
23. “手查” 車既,都只係響某幾條街兜黎兜去
24. 係咁安全既香港, 成日係會有警員係街頭開槍槍戰
25. 開槍槍戰之前, 會有一推白鴿出現, 非常不明白
26. 咖喱啡(按：小角色)手臂中槍即死, 主角胸口中槍都行得走得.
(附加按：又或者係中槍撐住遲遲未死得，尤有甚者可以復活)
27. 主角服飾十年如一日, 幾乎日日著埋同一件衫.
28. 除左的士, 紅色小巴, 主角唔會坐其他交通工具.
29. 主角一定可以在目的地門前找到車位泊車。
30. 主角剛剛開完幾百發子彈, 灼熱的手槍可以若無其事的插在腰間,
絕對不會燙傷蛋蛋.
31. 壞人殺好人前一定有時間解釋害人的原因,手法. 等好人有時間搵其他辦法
逃走或殺番轉頭.
32. 女角訓醒都係化晒裝的
33. 主角都能在爆炸的火焰燒到自己的 0.0001 秒前逃生
且爆炸通常在岸邊發生，以便主角跳入水中
34. 背景音樂 (附加按：主角會好像聽到背景音樂般，有些甚至會跳舞)
35. 維港d水一定比泳池乾淨
36. 熄燈用電腦, d字一定好清楚咁成面都係
37. 打e-mail時d字一定無雷公咁大隻
38. 咩線都無connect就可以上網(我又唔見佢有wireless LAN喎)
(按：其實現在的有線上網都可以不用登入，一開電腦即可連線，香港寬頻即是一例)
39. 主角架車炒之前會變左錢七先
40. 唔會無油架d車, 成幾耐都好
41. 響d入password既keypad上面套左4個數字出來之後, 一定會撞o岩個sequence
42. 電話機房永遠都係無掩雞籠
43. 有部Laptop就萬能架喇, 求其隊幾條電線入去就可以有image睇
44. 差佬好鐘意用車來欄路的
45. (TVB's program only) 只有2種罐裝飲品, 分別係Beer同juice....
*剛剛好出左10個*
46. 支煙食到一半...但係會越食越長...
或杯汽水橙汁食到一半...又會越飲越多...
47. 在屯門的銀行打劫...走兩個街口...便可以到旺角火車站搭火車走人...
48. 壞人被捉後一定會講解點解咁做,一定會講番成件事係點.
49. 主角睇文件或用電腦時一定會戴番副平眼鏡 (按：扮到好像好文好型咁).
50. 好人同壞人一定會同一時間落完口供出黎仲一定會遇到
51. 架車係深井上公路時是去九龍方向, 出公路時係用小欖向九龍方向的出口
(按：深井的位置是在小欖和九龍中間)
52. 架車永遠行快線, 但永遠會比行慢線的車慢
53. 炒車時附近一定有修路工程/紙皮箱/藍色膠筒, 重一定會反車
54. 船廠永遠是罪犯溫床/「交易」地點
55. 著住成個 Rambo look 的人一定不會中槍
(按：Rambo 是席維斯史特龍主演的”藍波”角色，性格為罔顧法律, 只懂蠻幹的人，且對自己認為是正義的事便不擇手段、不理法律的人)
56. 坐巴士的話一定是城巴, 無論是海怡半島, 兆康苑定係西貢
57. 搭公共交通永遠是可以門口到門口, 唔使行之餘重唔使轉車
58. 主角最需要用電話時, 個電話永遠都係無電/無開/唔見左/唔記得帶/收唔到
59. 打鬥時, D 卒仔永遠都係逐個逐個同個主角打, 永遠唔會一齊上
60. 打鬥地點多數有大玻璃窗, 又梗有一個卒仔撞爛哂隻窗跟住飛埋出去
61. 隻揪時, 主角永遠都先俾人打到死下死下, 然後”突然發力”就會打贏
62. 法庭審咩案都係用中文
63. 當有大事發生時, 主角好多時都會開電視,
而電視一開就會是 "現在係持別新聞報告..."
64. 趕唔到車的下場是落雨淋濕身
65. o係餐廳食完野可以是但放底一張銀紙就走,唔洗埋單.
66. 追逐完十幾條街, 仲可以面不紅氣不喘, 甚至打交都仲得!
67. 男女攪完野之後, 在床上面, 總係女既用被遮全身, 男既只遮下半身,
都唔明點解唔著返衫先訓既....
68. o的 BB 仔一出生就有好多頭髮
69. 當一對可能發展戀情的男女一起乘升降機, 一定會 "困 lift", 並有80%
機會燈火會全熄, 而消防員會等到男女表白完畢後抵達救人
70. 流金歲月中, 羅家良要搵向海嵐, 駕車方向係先由清水灣道往
彩虹方向, 跟住鏡頭一轉又變成由彩虹向西頁方向....咁其實
佢要去邊 ??!!
(按：清水灣道連接彩虹及西貢)
71. 所有要搭的既演員一行出路口遞手就會有的士埋黎,一係就二個演員同時
上一架車.
72. 每次有人無意掉左重要物件/文件落垃圾桶,D垃圾梗係掉左去後樓梯,
大廈清潔又梗係剛剛將垃圾送左去垃圾站,有時又咁好彩垃圾車收垃圾,
無論係乜野時間(又唔見我棟大廈D清潔咁勤力...)
73. (時裝劇都有, 但古裝武俠劇更常見)某人突然病發,或中毒,或受傷,
服食藥物或解藥後唔駛三秒條氣就順番晒, 乜事都冇, 老虎打死幾隻.
(附加按：但一定會有足夠時間給主角色找解藥的，不會”一病即發”)
74. 逢親飲醉酒, 十個有九個都大大聲話自己冇醉.
75. 幾乎個個主角都有錢到住親醫院都係一個人訓o既私家病房.
76. 試親白粉都係用界刀界開個膠袋, 用手指挑少少放入口食...唔死架?
77. 電視劇集入面主角睇電視永遠係睇自己個台.
(按：如無線電視播放的劇集，其主角都是看無線電視的)
78. 除左劇本指明要打乞痴/打喊路之外, 永遠冇人會自然地打乞痴/打喊路.
79. 主角永遠都可以逃得開機關槍既掃射,仲要係敵人一路對住佢射主角一路跑
(附加按：有時還可以看到子彈橫空飛過的痕跡)
80. (無線時裝) 大結局反派一定有槍
81. (成龍) 唔使食飯, 唔使去次所...
82. (荷里活片) 主角一定唔會死 , 但其他地方既電影就未必, 如這個殺手不太冷,
因為不是出自荷里活導演, 是歐洲導演(好似是法國人)
83. 個主角死前都會長篇大論咁同身邊的人交代後事。慌死觀眾唔知就死咁。
84. 只要劇情需要，人係可以清楚睇到部以時速百幾公里經過既車上便既人既樣
但同時，那個人可以看不見在身邊緩緩行過的另一個主角
85. 如果個話 '做埋呢次就收手', 今次既任務一定會出事....
86. 差人o係案發現場已經再搜集唔到任何新線索, 但主角一到場,
一句"不如再搵多次..."既對白後, 就必定會有新發現!
87. 壞人的犯罪證據一張1.44mb floppy就夠裝.
88. 失婚婦人一定可以變女強人, 變了女強人後個老公又一定返轉頭.
89. 無論主角係咩職業, 間屋一定有過千呎, 每人有一間房.
90. 一對男女普通朋友, 一起在街上行走時, 總會發生 "不小心跌倒" 的意外,
跌倒的多數是女的, 而男的總會以面向鏡頭的角度攔腰抱住女方, 使後者
以 45 度仰角拗腰仰視前者; 並且不論雙方原來高度, 這樣抱著時, 兩人的
雙眼會剛好成一直線, 讓兩人四目交投至少2 , 3 秒之久。望夠了之後, 女的
會突然腰技一直彈起, 然後表現出十米以外的人都看得出的尷尬表情, 偏偏男
方卻會留意不到, 顯出若無其事的神情。
91. 承上題, 如果未有跌倒的一方接不住跌倒的一方, 他們就會雙雙倒地, 前者會
剛好壓住後者, 後者這樣被重擊下, 非但不會覺得痛, 更會"無意"用咀唇觸=碰
對方面部 (對, 也是不論雙方高度, 總會 "碰到" 的)
92. 槍戰時, 中槍的人會成個彈起身. 如果係企係碼頭邊, 佢地會凌空轉體翻身
一個圈先至跌落水.
93. 成班飛虎隊O既人都唔可以捉倒一個手無寸鐵O既壞人.
94. 警方得到壞人的犯罪資料, 如果係有密碼保護, 佢地總可以在期限前以人腦去
想出個密碼係乜.
95. 傾手提電話永遠唔會講講下中途 CUT 線. 接收又鬼咁精晰.
(附加按：又或許在緊急情況下手提電話才會沒電)
96. 佢地搭車永遠有位坐, 即使是巴士或者地鐵.
97. 食飯永遠都好好飯菜, 每餐總會有好多碟食餘食唔晒.
98. 大廈管理員唔會訓覺, 仲會打醒精神睇住個閘.
99. 兄弟姊姐係屋企永遠或好少會打架, 甚至唔會搶玩具玩.
100. 學生唔使點樣做功讀或讀書, 成日係圖書館傾偈但都可以會考合格,
甚至讀埋大學.
[ 本帖最後由 烈燄之火 於 2007-6-25 06:18 編輯 ] |
|
發表於 2007-6-25 06:16:05
發表於 2007-6-25 12:56:11
