蘇格蘭戰意勝巴西

北辰水寧

http://football.on.cc/football/new/20110327/fbnewa0101x0.html

今晚馬會唯一開盤嘅國際熱身賽，蘇格蘭對巴西將於阿仙奴主場阿聯酋航空球場舉行，估計最少有四萬名蘇格蘭球迷撐場，同主場出戰冇乜分別，巴西牌頭係響，但多位名將都冇入選，對住打甩門牙帶血吞嘅蘇格蘭，巴西讓波冇着數，樂比仔冷敲「讓球主勝」。 （周日晚9時開賽）




巴西去年世界盃後，由文奴文尼斯擔任領隊，但佢領軍成績麻麻，唔計之前贏實力較次嘅伊朗、烏克蘭同美國，近兩仗對住法國同阿根廷都輸波，由於佢只係「執二攤」，而巴西足總頭號目標拿美奴正失業，樂比仔唔知道巴西再輸落去，文奴文尼斯嘅飯碗仲保唔保得住。


巴西新丁多難擔大旗


文奴文尼斯最大賣點係肯用新人，好似今場熱身賽，就冇徵召卡卡、羅賓奴同埋路爾斯法比安奴等星級球員，另外柏圖亦因傷退隊，取而代之係超級新人尼馬，樂比仔老友連拿度奧古士圖等，冇人會質疑呢班新人嘅能力，但咁快要佢哋擔大旗似乎快咗啲，巴西今次徵召嘅十三名中前場球員之中，僅三人代表次數超過十次，進攻冇重心，咬唔咬得入蘇格蘭實屬疑問。


蘇格蘭賽前拉隊集訓


蘇格蘭技術平庸，但卻充滿血性，樂比仔從來唔會懷疑佢哋嘅爭勝決心，亦唔太在意佢哋嘅人腳，因為幾乎每次國際賽，蘇格蘭都有大批傷兵，好似今仗就有費查、賴史密夫等人受傷，但好老實講，捧蘇格蘭唔係因為有咩球星，而係信佢哋嘅鬥志，即係話呢隊波冇話冇咗邊個唔得，從佢哋賽前拉隊到西班牙集訓，足見佢哋好有誠意踢好今場波，咁已經好足夠。




蘇格蘭另一優勢係領隊拿維連以前教開細球會，你知喺蘇超打滾，基本上係些路迪同格拉斯哥流浪惡晒，所以拿維連非常精於以弱制強，今場對巴西可大派用場，今場勝負關鍵在於兩隊心態，巴西一心諗住賺戲金兼試陣，而蘇格蘭則為榮辱而戰，梗係信蘇格蘭啦！

愛新覺羅頌賢

呵
蘇格蘭剛輸才發此帖

北辰水寧

方向報會不會馬後炮呢? 呵呵

關二哥

算吧，蘇格蘭怎可能是巴西的對手......