政情：新政府總部猶如孤島

索額圖

政情：新政府總部猶如孤島港府管治失策，搞到香港社會和諧度愈嚟愈差，依家趕緊工嘅添馬艦政府總部雖然以「門常開」作設計概念，但實情卻係一座孤島，所以若再爆舊年高鐵事件幾千市民圍堵立法會嘅翻版，或泰國紅衫軍攻佔國會嘅事件搬嚟香港，「門常開」總部內嘅人都係冇碇走。
添馬艦工程圖則顯示，建築群東面同西面分別各有兩個行人及車輛出入口，另有兩條分別連接金鐘海富中心同中信大廈嘅天橋，但冇一條離開添馬艦嘅秘道，只係得一條連接政府大樓同立法會嘅秘道，所以若爆高鐵事件翻版，啲官員、議員一樣係無路可走。咁泰國嘅國會議員可以擔梯爬牆、坐直升機撤離，香港得唔得呢？結論係新政府總部一樣冇呢支歌仔唱，事關建築物嘅設計無法負荷直升機嘅重量，睇嚟都係起大個廚房儲定糧水實際啲。

堪輿風水學家楊天命話，新政府總部所在地猶如一個荒島咁孤立無援，雖然搬到維港海邊有旺財之效，但遠離靠山，意味政府權力愈嚟愈少，加上「門常開」設計中空，代表冇權力，亦恍如一個「口」字，致較多口舌是非之紛爭，造成政治爭拗，影響管治威信。楊師傅表示，原本設立秘道可有「潛龍」之意，將股龍氣帶入新政府總部，可略為代替靠山之效，權力得以維持，不過現實情況係新嘅政府總部既冇靠山又冇潛龍，真係戥佢閉翳。